Para sa presidente sang Bacolod Alliance of Commuters, Operators and Drivers (BACOD) – Manibela kaangay nga temprano nga pamaskwa ang pag-grant sang provisional authority sa ila agud makapadayon sa ila palangabuhian.
Sa interview sang Bombo Radyo Bacolod kay Rudy Catedral, kadalag-an para sa ila ang paggrant sang provisional authority nga bisan pigado ang ila byahe basta legal lang ini.
Suno diri, antes sila ginhatagan sang PA, naglabay sila sa Motor Vehicle Inspection Center agud lantawon ang road worthiness sang ila salakyan.
Apang, tubtob lamang sa Disyembre ang ila PA kag nagasalig sila kay Councilor Atty Dindo Ramos, chairperson sa committee on Transportation nga makarenew sila liwat sang PA nga may isa ka tuig nga validity.
Ginpasiguro naman ni Catedral sa mga pumuluyo nga bisan sige-sige ang pagsaka sang presyo sang produktong petrolyo, indi sila magpasaka sang plete.
Samtang, ginkalipay man nila nga na-acquit ang kaso nga ginfile sang pila ka pulis sa ciudad nga simple disobedience kasunod sa natabo nga pagpangbomba sang tubig sa mga lideres sang transport group sang Setyembre 18, 2024.
Dugang pa sini, kadalag-an man para sa ila nga nasuspend si councilor Al Victor Espino nga nagakontra sa ila nga mga traditional jeepney drivers.
