Nagapangayo sang bulig ang Bacolod Environment and Natural Resources Office (BENRO) sa mga Barangay, nga magbulig agud madula ang mga illegal dumpsites sa ciudad.
Sa interview sang Bombo Radyo Bacolod kay BENRO Officer in Charge Atty Allyn Luv Dignadice, nagnormalize na ang performance sang International Solid Waste Integrated Management Specialists, Inc. (ISWIM).
Apang aminado ini nga yara gihapon ang problema sa mga late throwers kag illegal dumping.
Ini bangod kun makalabay na ang garbage trucks, kag ulihi na nga mapagwa ang basura, ini ang mahakot sa masunod na nga pagbalik sang garbage haulers.
Ang ISWIM ang magapatigayon man sang remapping.Suno kay Dignadice, nagsaka sa 1,700 tubtob masobra 2,000 cubic meters per day ang mahakot nga basura sang ISWIM, nga dako nga mas mataas sangsa ginahakot sang IPM Construction and Development Corporation nakaligad nga tuig.
Sa karun, ginaplastar naman sang ISWIM ang transloading area, agud nga mas mapadasig ang pagbalik sang mga garbage trucks.
Suno diri, sila ang magapatawag sang meeting sa pagpanguna sang Department of Environment and Natural Resources, upod sa mga Punong Barangay kag iban pa nga Brgy Officials, agud nga matudlo ang nagakaigo nga apprehension sa mga illegal nga nagahaboy sang basura.
Pahanumdom sini nga responsibilidad sang mga Brgy officials ang pagmonitor kag pagseguro nga wala sang mini dumping sites sa ila area of responsibility.
