Nagpasalig si Bacolod City Vice Mayor El Cid Familiaran nga talakayon sa sesyon sang Sangguniang Panlungsod ang nahanungod sa paghatag sang cash assistance sa mga magapositibo nga food delivery riders nga nakigbahin sa surveillance testing sang Sabado kag Domingo.
Suno kay Familiaran, maayo nga suhestyon ang paghatag sang bulig pinansyal ilabi na sa mga food delivery riders nga indi gani makabig nga minimum wage earners bangod nakabase lang sila sa commission.
Isa sa rasun kun ngaa ginakahangaw-an sang mga riders nga makigbahin sa surveillance tesing amo ang matukiban nga positibo kag ipaidalum sa quarantine sa sulod sang 14 ka adlaw kasubong man ang bilog nga panimalay.
Wala man sang mangin problema sa pagkaon bangod ginasabat ini sang gobyerno apang wala naman magamit ang pamilya ilabi na sa mga balayran.
Suno sa Bise alkalde, nagahatag ang mga manggaranun nga pungsod sang $2,000 sa mga pumuluyo nila nga mapaidalum sa lockdown apang indi ini masarangan sang gobyerno sa Pilipinas.
Apang bangod sa nakita sini nga manami ang proposal, pagabuksan ini ni Familiaran sa ila mga pamulungpulong sa bisan pila lang nga masarangan nga bulig pinansyal.
Suno pa diri, may mga tinion nga bugas kag sardinas lang ang ginahatag sang gobyerno apang may ara sang mga pamilya nga may magagmay nga mga kabataan nga nagakinahanglan pa sang gatas.
Suno sa bise alkalde, makapila na ini ka beses nga sya na mismo ang nagbakal agud nga may gatas ang mga bata.
