Ginpili ni Negros Occidental 5th District Congressman Dino Yulo nga maghatag sang kalingawan sa mga naapektuhan sang paglupok sang Bulkan Kanlaon.
Sa interview sang Bombo Radyo Bacolod sa kongresista, sila ang nagdala sang clowns, nagpatigayon sang mga pahampang, nanghatag sang pudding kag mga juice kag iban pa, sa tinutuyo nga ma-ibanan ang kasubo nga nabatyagan sang mga apektado sang kalamidad.
Paathag ni Yulo nga ang inisyatibo ang madugay na nila nga ginapatigayon ilabi na para sa mga nag-evacuate sa nanliligad nga mga engkwentro sa tunga sang militar kag rebelde nga New People’s Army (NPA).
Suno diri, nakig-angot sa iya ang grupo sang mga doktor nga nagapamangkot sa sitwasyon sang mga kabataan, kag sa litrato nga ginpadala sini makita ang kasubo sa mga mata sang biktima.
Ginpadal-an man ang mga biktima sang drawing books, kun sa diin nakita nga mayorya sa ila artwork ang kolor nga itom kag pula, nga nagapakita sang trauma sang mga kabataan.
Agud mapanas bisan makadali lamang sa pinsar sang mga kabataan ang trahedya, sila ang nagpatigayon sang mga programa nga makapalipay sa mga ini.
Kalakip sa mga nagbulig sa inisyatibo ang mga scholars kag former scholars sang 5th District, Sangguniang Kabataan (SK) volunteers, fraternities kag iban pa nga grupo sang volunteers.
Ginakalipay man ni Yulo nga busog sang community effort ang probinsya sang Negros Occidental.
Dako man ang pagpasalamat sini sa bulig ni Department of Social Welfare and Development (DSWD) Secretary Rex Gatchalian kag natalana nga pagbisita ni House Speaker Martin Romualdez, kung sa diin ginaplastar na ang ginpadala sini nga inisyal nga bulig para sa iya nga pagbisita sa probinsya.
