Maayo nga balita para sa jeepney drivers ang P5,000 nga fuel subsidy para sa mga public utility drivers, apang dapat nga mabantayan nga ini ang magakadto gid sa matuod-tuod nga driver.
Sa interview sang Bombo Radyo Bacolod kay Jun Jun Asis, Secretary General sang Sentrong Samahan ng mga Tsuper at Operators Negros, kun ipanaog sang Department of Social Welfare and Development (DSWD) sa local government unit ang pondo, nagakahangawa ang mga ini nga indi makalab-ot sa jeepney drivers ang bulig pinansyal.
Ini ang ginpaanggid niya sang pandemic kun sa diin nagpanaog man sang Social Amelioration Program (SAP) apang sa Barangay gintanyag ang pagsumiter sang listahan.
Suno diri, may mga Brgy officials nga ginpasulod ang ila nga mga himata apisar nga indi man drivers.
Panugyan ni Asis nga derekta na lamang nga magkuha sang listahaan sang mga kooperatiba ukon korporasyon.
Paagi sini, matumod kun pila ka numero sang units nga nagabyahe.
Suno kay Asis, ang isa ka salakyan ang may duha ka driver, bangod ang kada unit ang may-ara sang extrador.
Apang pahanumdom sini nga dapat ivalidate man ang numero sang unit, kun ang mga ini ang ginagamit gid man sa pagbyahe, bangod may mga opisyal man sang kooperatiba kag korporasyon nga sindikato kag nagadugang sang numero agud makapasulod sang dugang nga benepisyaryo.
Sa pihak nga bahin, panawagan man sini nga indi pagpatam-an ang mga requirements sa pag-avail sang ayuda.
