Luyag sang Silay City Police Station nga mahatag ang kalidad nga serbisyo sa komunidad sa pagpatahum sini sang ila estasyon kasubong man nga nangin Top Performing City Police Station sa sulod sang napulo ka bulan.
Sa interview sang Bombo Radyo kay P/Lt Col. Mark Anthony Darroca, hepe sang Silay City Police Station, ila ginpatahom ang estasyon agud mahatag ang maayo nga serbisyo sa mga pumuluyo.
Suno diri, agud nga mabatyagan sang mga kliyente ang katawhayan nga kun kaisa bangod sa matawhay nga plastada sang estasyon may yara ini sang impluwensya sa modo sang isa ka indibidwal nga mas ginapakamaayo na lang nga ipaagi sa settlement kag indi na magpasaka pa sang kaso.
Siya man ginkwestyon kun ngaa ginpa-renovate pa sini ang estasyon apisar nga may yara naman sang igatukod nga bag o nga police station sa masunod nga tuig, sabat ni Darroca, indi dapat nga mabudlayan ang tawo kag hulaton pa ang masunod nga tuig antes sila makakita sang malimpyo, mahamot kag matawhay nga police station.
Dugang pa niya, ang pumuluyo nagakinahanglan sang kalidad nga serbisyo gikan sa Philipine National Police.
Santo naman sa eksperyensya sini ang mga tawo nga malimpyo kag desiplinado, nagaangkon sang respeto, gani masami sini nga gina-remind ang iya mga personnel nga mangin mahipid kag malimpyo.
Bangod sa matahum nga police station, madamo sang nakibot kag nagadayaw sa Silay City Police Station.
Samtang, consistent naman ini nga nangin Top Performing City Police Station sa sulod sang napulo ka bulan.
Suno kay Darroca, mabudlay nga I-maintain ang accomplishment apang bangod sa ila pagbululigay ila na-agom ang ini nga achievement.
Pahayag ni Darroca, one step at a time, agud ma-attain ang plano nga pag-improve sa kalidad sang Silay City Police Station.
