Gin-aprubahan ni Presidente Ferdinand Marcos Jr. ang paghatag sang one-time nga gratuity pay nga nagabalor P7,000 para sa mga contract kag job order sa gobyerno.
Ang dugang nga sweldo sa idalum sang Administrative Order (AO) No. 39 nga napirmahan sang Disyembre 11, 2025, ang para sa mga contract of service (COS) kag job order (JO) employees nga nakahatag sang kabug-usan nga apat ka bulan ukon sobra pa nga serbisyo tubtob Disyembre 15, kag may mga kontrata nga epektibo pa sa amo man nga petsa.
Suno diri, ang paghatag sang year-end Gratuity Pay sa COS kag JO workers ang pagkilala sa ila kabudlayan kag partisipasyon sa pagpatuman sang nagkalain-lain nga programa, aktibidad, kag proyekto sang gobyerno, kag sa ila importante nga papel sa paghatag sang serbisyo publiko.
Santo sa Administrative Order, bisan nga ang COS kag JO workers ang nagabaton sang sweldo nga kaangay sa regular nga empleyado sa kapareho nga posisyon sa gobyerno, sila ang wala ginahatagan sang mga benepisyo nga ginahatag sa regular employees.
Kalakip diri ang mid-year kag year-end bonus, performance-based bonus, kag personnel economic relief allowance.
Ang mga empleyado nga nakaserbisyo sang mas manubo sa apat ka bulan kag may satisfactory nga serbisyo mahimo gihapon nga makabaton sang gratuity pay sa pro-rata basis.
Ang naka-tatlo ka bulan apang wala pa makalab-ot sa apat ka bulan nga serbisyo ang makabaton sang gratuity pay nga tubtob P6,000.
Ang may duha ka bulan nga wala nakalab-ot sa tatlo ka bulan ang makabaton tubtob P5,000.
Samtang ang manubo sa duha ka bulan nga serbisyo ang makabaton sang tubtob P4,000.
Sakop sang mando ang mga empleyado sa national government agencies, state universities and colleges, government-owned or controlled corporations, kag local water districts.
Ipagwa ang gratuity pay antes mag-abot ang Disyembre 15.
