Ginkumpirmar sang City Treasurer sang ciudad sang Bacolod nga sa kapin 1,200 ka mga empleyado sang Bacolod Government Center, malapit 10% na ang nakabaton sang ila performance based bonus.
Madumduman nga gin-aprubahan sang Sangguniang Panlungsod sang tinalikdan nga mga semana ang ordinansa nga nagapain sang P19 million nga pondo para sa performance based bonus sang mga empleyado sang BGC matapos magbaton sang Seal of Good Local Governance ang ciudad nagikan sa Department of the Interior and Local Government (DILG).
Sa interview sang Bombo Radyo kay City Treasurer Giovanie Balalilhe, ginpahayag sini nga malapit sa 10% pa lang sang mga empleyado ang nakabaton sang performance based bonus bangud may iban nga mga departmento nga wala pa nakatapos proseso.
Suno kay Balalilhe, indi uniform kag magadepende sa performance sang kada departmento ang bonus nga ila mabaton kun sa diin apat ka mga departmento ang makabaton sang 65% sang ila sweldo kag ini ang ginalakipan sang City Health Office, City Treasurer’s Office, Office of the City Assessor kag Planning and Development Office.
57% naman sang ila basic salary ang mabaton sang nabilin nga mga departmento.
Nalakip sa mga makabaton suno sa city treasurer amo ang alkalde, city councilors, department heads kag nabilin nga mga empleyado.
