BACOLOD CITY – Ginalantaw nga paghinisaay sa pagbaligya sang ilegal nga druga ang motibo sa likod sang pagpatay sa ginapatihan agi sa Purok Sigay, Barangay Dos, kaina sang kaagahon.
Base sa kumpirmasyon ni Police Chief Insp. Benedicto Villarias, hepe sang Police Station 2, ang biktima amo si Anthony Tenebroso, 25-anyos, tumandok sang ciudad sang Cadiz apang nagapuyo na sa Purok Sigay, Barangay 2, ciudad sang Bacolod.
Suno kay Villarias, base sa inisyal nila nga imbestigasyon, runner sang ilegal nga druga sa nasambit nga lugar ang biktima kag daku ang posibilidad nga ang paghinisaay ukon ilinaway sa mga nagabaligya sang shabu ang rason sa pagluthang sa iya kaina sang kaagahon.
May kabudlayan naman ang kapulisan sa pagkilala sa mga suspetsado bangud wala sang pumuluyo sa lugar nga makasugid sa ila sa identity sang mga ini.
Si Tenebroso napatay bangud sa igu sang bala sang 45 caliber pistol sa naidalom nga bahin sang dughan sini.
