Gina-alegar bangud sa paghurikap sa dughan sa manghud sang babayi ang gintunaan sang away mag-asawa nga nagresulta sa pag-utas sang kabuhi sang isa ka suldado kag pagbuno sa asawa sa Purok Tilapia, Barangay 3, Bacolod City, kahapon.
Ginkilala ang biktima kay Erwin Pendon, 31 anyos kag active member sang 11th Infantry Battalion sang Philippine Army samtang asawa naman amo si Leonora Pendon, 26 anyos kag lunsay mga residente sang nasambit nga lugar.
Ang amay sang suldado amo si Edwin Pendon, 52 anyos kag residente man sang Purok Tilapia, Barangay 3, Bacolod City.
Sa interview sang Bombo Radyo kay alyas “Angel”, manghud sang biktima nga si alyas Leonora, nagselebrar ang mga ini sang iya kaadlawan sa isa ka resort sa Brgy 1.
Suno kay Angel, sang nahubog si Edwin, ginpangtiklod sini ang iya mga utod kag gina-alegar ginhurikap ang dughan sang isa pa niya ka magulang.
Suno diri, nanugid ang iya magulang kay Leonora kag didto na ginkomprontar ang iya bana.
Nagpanginwala si Erwin nga ginhimo ini sang iya amay gani ang mag-asawa ang nagsabtanay.
Suno kay Angel, naghambal na nga daan si Edwin nga patyon sini ang iya umagad.
Pagpuli sa ila balay, naghambal si Leonora kuhaon ang maleta bangud malayas sila.
Didto na nabatian ni Angel ang paglupok sang armas.
Nagpanago ini kag liwat nga nabatian ang ikaduha nga paglupok kun sa diin diri na gin-utas sang suldado ang iya kabuhi.
Sang nag-abot ang amay ginbuno sini ang iya umagad.
Nakapadalagan pa si Leonora apang ginlaot siya ni Edwin kag ginbuno liwat sang makapila nga beses nga nagresulta sang iya kamatayon.
Ginapahayag 11 ka pilas tuga sang pagpangmuno ang naagom sang iya magulang.
Nagsungka naman ang suspect sa mga kapulisan matapos ang krimen.
