Para sa retired police colonel sa ciudad sang Bacolod ang rason kun ngaa madamo sang kaso nga involved ang kapulisan ang bangod sa mahuyang nga ledirato.
Sa interview sang Bombo Radyo Bacolod kay Retired Police Colonel Armando Tubongbanua, para sa iya indi na hugot ang disiplina sa mga kapulisan.
Suno diri, mahimo ini ang resulta sang pigado nga ledirato sa chief PNP.
Nakita sini nga nag-umpisa ang tanan sa tiyempo anay ni former PNP chief Alan Purisima tubtob sa pagbulos ni Police General Rommel Francisco Marbil.
Suno kay Tubongbanua, naobserbahan sini nga nagkaladula na ang best practices sa mga pulis kaangay na lamang sa natabo sa Sibulan, Negros Oriental kun sa diin ang mga pulis yara sa sulod sang resto bar, nakasibilyan, naga-inom inom kag may dala pa nga armas luthang.
Dugang pa sini, wala pa sang insakto nga police action sa pagrestrain sa suspek.
Pahayag sang retired PCol, indi lang sa amo ini nga kaso involved ang mga pulis, may natabo man nga ginraid sang mga pulis ang drug suspect apang ang naabtan ang nobya sang suspek nga ila ginbulos-bulosan himuslan samtang may natabo man nga may imbestigador nga pulis nga kun gab-i nagapanghold up naman.
Sa karun, dako nga pamangkotanon kay Tubongbanua kun ngaa madamo sang kaso nga involved ang mga kapuilisan.
