Welcome development para sa Executive President sang Bayan Muna ang pagka-aresto kay dismissed Bamban, Tarlac Mayor Alice Guo, apang madamo man ini sang nakita nga mga kapaltahan.
Sa interview sang Bombo Radyo Bacolod kay Atty. Carlos Isagani Zarate, makita nga mas efficient ang kapulisan sa Indonesia sangsa mga kapulisan sa Pilipinas nga gingamit na ang tanan nga resources wala gihapon makita ang dalagko nga mga personalidad nga wanted sa layi.
Suno kay Zarate, sa pagbalik sa Pilipinas maatubang na ni Guo ang madamo nga mga pamangkot sa Senado, Kongreso kag mga pumuluyo.
Partikular na sa kaangtanan sini sa mga issue nga involved ang National Security.
Maayo man suno kay Zarate nga mapaidalom sa executive session si Guo apang sa general rule, mas nagakadapat gihapon nga public hearing ang patigayunon.
Indi naman mangin conflict ang pagpagwa sang Capas Regional Trial Court Branch 109 sang warrant of arrest kay Guo sa paglapas sa Republic Act 3019 ukon Anti Graft and Corrupt Practices Act.
Paathag sini nga responsibilidad sang arresting officer nga iturn-over sa kustodiya sang korte ang subject sa warrant of arrest apang makahimo man sang arrangement nga ini ang sarang ma-escortan kun kinahanglan magtambong sa Senate Hearing.
Nagalaom ini nga indi kaangay sang tinalikdan, magasugid na sang matuod sa Senado si Guo kalakip na sa gina-alegar death threat agud mahatagan sang nagakaigo nga proteksyon.
Apang sa pihak sini wala nanamian ni Zarate amo ang nakita nga VIP Treatment sang sang mga government officials sa pagpauli ni Guo.
Pahanumdom sini nga dapat mangin sensetibo kag ini ang indi dapat gamiton bilang optics sa mga plano sa politika para sa palaabuton.
Suno diri, kun nagpapicture gid man ang mga ini sa akusado, dapat nga ini ang gintago na lamang kag wala na ginpakita sa publiko, bangod indi malikawan nga ma-offend partikular na ang mga biktima sang inhustisya.
