Dako ang epekto sa New People’s Army sang pagkadakop sa tiya ni Arnel Tapang nga isa man ka regional officer sang Communist Terrorist Groups.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion, ang pagka-aresto kay Alias Pinky, 58 anyos ang resulta na sang pursuit operation matapos ang engkwentro sa Barangay Bandila, Toboso, Negros Occidental sang Disyembre 13.
Sa nasambit nga engkwentro sila ang nakarecover man sang pila ka high powered firearms kag mga subersibo nga dokumento.
Kasunod sini, sila ang nagpatigayon na sang pursuit operation tubtob nga pasurpresa nila nga nadakop si Alias Pinky samtang nagapungkuon sa gwa sang iya balay.
Siya ang may pending warrant of arrest sa kaso nga frustrated murder, apang ginalantaw ni Samoza nga madamo pa ini sang iban nga kaso.
Ginalantaw sini nga madugay na sa makawala nga grupo si Alias Pinky bangod siya ang napromote na bilang Regional Officer sang CTG.
Siya man ang ginapanaguan ukon nagatago sang mga makawala nga grupo nga may mga pending nga kaso partikular na sa mga remnants sang dimantled na nga Northern Negros Front ni Arnel Tapang nga may patong sa ulo nga P1 million.
Aminado si Samoza nga isa sa kabudlayan nila sa pagdakop sa mga rebelde ang sa tion nga yara na sa kumunidad kun sa diin masami nga nagasulod sa mga pamalay ang mga rebelde.
Sila ang indi naman pwede nga basta magsulod sa mga balay-balay bangod sila ang may ginasunod nga rules of engagement kag ginakonsiderar ang kinamatarong sang sibilyan.
Apang pahanumdom sini sa mga pumuluyo nga ang nagatago sang mga wanted sang layi, ang mahimo man mangatubang sang kaso.
