Palaligban gihapon para sa pamilya De Los Santos sa banwa sang La Castellana kun sa diin na subong si Renel Delos Santos nga namissing kaupod ang iya abyan halin pa sang Abril 19.
Suno sa amay ni Renel nga si Ricky Delos Santos sang Barangay Talaptap, banwa sang La Castellana, ang 22-anyos nga si Renel ang naglakat sang Abril 19 sang hapon bangud may gindul-ong ini nga isa ka babayi sa Barangay Aranda, banwa sang Hinigaran kag gingamit sini ang motorsiklo sang iya nga kakilala nga si Denald Mialen, 18-anyos, residente man sang Barangay Talaptap, banwa sang La Castellana nga nag-upod man sa iya.
Apang tubtub subong, wala na sila nakapauli.
Suno kay Ricky, wala sang dala nga cellphone si Renel bangud nabilin ini sa iya asawa gani indi ini macontact.
Si Renel ang may yara na sang asawa kag isa ka bata.
Indi man kilala sang amay kun sin-o ang gindul-ong ni Renel bangud makaisa lang ka bes niya ini nakita bisan ginaalegar nga nakaagi na tulog sa balay sang ugangan sini ang babayi.
