Nagpanindugan ang Bacolod City Police Office nga wala gin-abduct kag indi makabig nga missing ang tatlo ka persona nagikan sa Barangay Vista Alegre nga wala sa gihapon makit-an humalin sang Hunyo 2, 2024.
Madumduman nga nangayo sang bulig ang 23 anyos nga si Trisha Antiquera matapos nga wala nakapauli ang live in partner sini nga si Junel Nangan kag sa iya iloy nga si Loreville Antiquera kag live-in partner sang iya iloy nga si Joen Villacojer.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company kag spokesperson ni Bacolod City Police Office (BCPO) Director Police Col. Noel Aliño, wala sang natabo nga abduction bangod nga wala sang pwersa nga gingamit sa pagpasulod sa tatlo sa isa ka avanza taxi, kag nakita pa sang isa ka witness nga nag-fist bump ang isa ka tawo nga nagpasulod sa ila sa taxi sa isa sa tatlo ka namissing.
Dugang pa ni Brillo, indi man makonsiderar nga namissing ang tatlo bangod nga nahibaluan man nga naglakat ang mga ini kag wala sang komosyon nga natabo sa pagkuha sa ila.
Para kay Brillo, may yara sang komunikasyon si Trisha sa tatlo kag ini ginatago lamang nila.
Pahayag sini, mahimo man nga makonsiderar nga case close na ang natabo, bangod ini ang ma-consider nga non-crime related incident.
