Ginalantaw sang National Bureau of Investigation Bacolod nga abduction ang pagkadula sang tatlo ka mga persona sa Barangay Vista Alegre, Baoclod City, sang Hunyo 2, bangod nga may gingamit nga armas-luthang gani may yara sang pagpamahog.
Madumduman nga nagpadulong sa opisina sang NBI-Bacolod si Trisha Antiquera, agud nga magpangayo sang bulig nga maimbestigaran ang kaso sang pagkadula sang iya live in partner nga si Junel Nangan kag sa iya iloy nga si Loreville Antiquera kag live-in partner sang iya iloy nga si Joen Villacojer.
Sa interview sang Bombo Radyo Bacolod kay Special Investigator William De Arca Jr. sang NBI-Bacolod, may yara sang CCTV footages kun diin natabo ang krimen.
Ila man ginareview kag ginaconnect ang mga statement sang witnesses.
Suno kay Arca, ginkadtuan sini ang area kun diin ginbilin ang apat ka tuig nga bata ni Trisha sa Crossing Camatis sa ciudad sang Bago.
Ang bata ang ginbilin sa sulod sang Southbay Subdivision sa Crossing Camatis, alas- 11:00 sang gab-i kag ini ang nalabyan sang isa ka pulis nga babayi nga nagabyahe padulong sa trabaho sini.
Nakit-an nga ang bata nagahilibion kag nagadalagan padulong sa sulod sang subdivision imbes nga paggwa sa lugar.
Santo sa statement sang witness, bag-o gid lamang ginbilin ang bata sa area sang ini nakit-an nga nagadalagan.
May yara man sang witness nga nakamotorsiklo nga dutayan lang nga mabunggoan sang SUV nga puti nga madasig ang pagpadalagan kun sa diin nakita sini nga madamo sang tawo sa sulod sang salakyan.
Kag ang SUV ang nakita ng naggwa sa subdivision kag nagbyahe pabalik sa ciudad sang Bacolod.
Isa sa palamangkotan sa karun suno kay Arca amo nga kun ngaa sa ciudad sang Bago ginbilin ang bata matapos nga sila ang ginasakay sa salakyan sa Brgy Vista Alegre sa ciudad sang Bacolod.
Dugang pa nga ang motorsiklo nga ginsakyan sang duha sa tatlo ka gin-abduct, ang ginsakyan sang wala nakilal-an nga mga tawo kag gindala samtang naga-convoy naman sa SUV ang duha pa gid ka nakamotorsiklo nga mga persona.
Pahayag ni Arca, posible nga madugay pa antes masolbar ang ini nga kaso bangod nga limitado ang ila nga resources kag witnesses apang ila ginalauman nga may mag-abot nga oportunidad nga makabulig sa imbestigasyon agud nga ini masolbar kag mahatagan sang hustisya ang natabo.
