Ginpanawagan sang Alliance of Concerned Teachers (ACT) sa Department of Education (DepEd) nga dulaon ang 15-day cap para sa service credits sang mga manunudlo.
Ini ang kasunod sang plano sang ahensya nga magpatigayon sang National Learning Camp sa masunod nga bulan nga magadungan sa kuntani bakasyon sang mga manunudlo.
Santo sa DepEd Order No. 53 sang 2003, ang service credits, amo ang leave credits nga naganar sa pagserbisyo sa mga aktibidad sa tion sang summer ukon Christmas vacation ukon luwas sa regular school year.
Sa idalom sang nasambitan nga order, ang isa ka adlaw sang vacation service credit ang katumbas sang isa ka adlaw ukon walo ka oras nga serbisyo.
Sa statement ni ACT chairperson Vladimer Quetua, indi patas kun ang service credits ang limitado lamang sa 15 ka adlaw bangod ang mga manunudlo ang nagatrabaho sang masobra 15 ka adlaw sa gwa sang ila primary duty.
Panindugan sini nga makabig ang mga ini bilang aktwal nga trabaho gani nagakadapat man nga may nagakaigo nga kompensasyon.
Una na nga ginpahayag sang DepEd nga ang National Learning Camp sa end-of-school-year break ang may tinutuyo nga ma-address ang learning losses bangod sa COVID-19 pandemic.
