Ginakabig nga welcome development sang Land Transportation Office Region 6 ang tikang sang national task force against COVID-19 sa pagpahanugot sa mga riders nga nagapuyo sa isa ka balay nga magsakay sa motorsiklo nga wala sang barrier sa mga lugar nga napaidalum sa general community quarantine kag modified GCQ.
Sa interview sang Bombo Radyo kay LTO 6 public information officer Riza Otayde, ginakabig sini nga positibo nga resulta sang ila mga apelasyon sa national IATF nga mahatagan sang solusyon ang kabudlayan sang mga riders.
Suno kay Otayde, sang naggwa ang memorandum circular 2185 nahanungod sa mga guidelines sa transportasyon sa tunga sang pandemic, aminado ini nga nagpangdakop sila sang pila ka mga persona nga nagabayolar bangud nagasunod lang sila sa mando.
Apang ila nakit-an nga madamo sang mga nagareklmo sang gindumilian ang angkas sa motorsiklo gani nag-apelar ang LTO sa gobyerno nga himuan sang pamaagi agud mapahanugutan ini.
Suno sa tagpamaba, sang napahanugutan na ang angkas apang kinahanglan sang barrier, madamo gihapon sang nagareklamo gani liwat sila nga nag-apelar bangud ila man naintindihan ang sitwasyon sang mga pumuluyo.
Nagalaom ini nga sa bag-o nga pagsulundan, masatisfy na ang mga riders apang nagpaandam nga kun may yara sang padayon nga magabayolar, wala gid sila sang may mahimo kundi mangdakop.
Gin-athag man sini nga para lang sa mga nagapuyo sa isa ka balay ang pagpahanugot nga wala sa motorcycle barrier kag kinahanglan ini gihapon kun lain ang naga-angkas.
Ila pa man ginahulat ang dugang nga pagsulundan kun limitado lang ini sa mga magkarelasyon kag mag-asawa.
Gindugang man ni Otayde nga kun magamit sang barrier, kinahanglan ang kaangay sang ginpagwa sang Angkas nga nagaserbe nga back shield sang driver.
