Nagpanawagan ang Bacolod Alliance of Commuters, Operators, and Drivers sa administrasyon ni President Ferdinand “Bongbong” Marcos Jr. nga ikonsiderar ang pagkakas sang Value Added Tax (VAT) ukon excise tax sa mga produktong petrolyo agud mabuligan ang sektor sang transportasyon sa tunga sang padayon nga pagsaka sang presyo sang gatong.
Sa interview sang Bombo Radyo Bacolod kay Bacod-Manibela President Rudy Catedral, ginpahayag sini nga mas maayo nga kakason ang VAT ukon excise tax sa petrolyo kaysa aprobahan ang ginapangayo nga P2 fare hike.
Suno kay Catedral, ang padayon nga pagsaka sang presyo sang gatong, kaupod ang mga buwis kag ang epekto sang Oil Deregulation Law ang nagapabudlay gid sa pangabuhi sang mga Pilipino, ilabi na sa mga public utility drivers nga nagasalig sa adlaw-adlaw nga pasada agud makapangabuhi.
Dugang pa, gamay na lamang ang nabilin nga kita sang mga drivers bangud sa mataas nga operating expenses, ilabi na ang gasto sa gatong.
Nagpaandam man ang grupo nga mahimo sila magpatigayon sang untat-byahe kun indi pagpamatian sang gobyerno ang ila panawagan.
