Ginpaathag sang commander sang Coast Guard Station Negros Occidental nga Biyernes sang hapon na sila nakabatun sang report gikan sa Tri-Star Shipping Company apisar nga kaagahon palang sang naglugdang ang FV St. Peter The Fisherman II.
Suno kay Capt. Ludovico Librilla, commander sang Coast Guard Station Negros Occidental, sang mabatun ang impormasyon, gilayon man nga nagdeploy sang duha ka barko ang PCG Iloilo bangod mas malapit ang lokasyon sang naglugdang nga barko sa Iloilo sangsa Negros Occidental.
Dugang pa sini nga indi man amo ang una nila nga nabatun nga site kun sa diin naglugdang ang shipping vessel gani wala gilayon napatigayon ang search and rescue operation.
Magapadayun man ang ila nga imbestigasyon sa kun ngaa madugay nga napalab-ot sa Philippine Coast Guard ang balita natuhoy sa pagkalunod sang barko.
Dugang pa ni Librilla, nga wala man ini sang ihibalo kun nagpatigayon gid man sang kaugalingon nga operasyon ang mga pamilya sang biktima agud mapangita ang ila mga himata.
Apang suno diri, nagpatigayon gilayon sang survey search sa lugar ang mga technical divers.
