Ginkwestyon sang alkalde sang banwa sang Moises Padilla kun sin-o man ang commanding officer nga nagpahanugot nga magresponder ang CAFGU Active Auxiliary (CAA) member nga nagresulta sa pagkapatay sang mag-amay nga sanday Godofredo Templatura, 70 anyos kag John Albert Templatura, 32 anyos kag pagkapilas sang duha ka indibidwal nga na-igo sang bala.
Sa interview sang Bombo Radyo kay Moises Padilla Municipal Mayor Ella Yulo, overkill ukon Excessive use of force ang natabo.
Suno diri, dapat nga barangay tanod ang nagresponder didto kag kun indi masarangan patawagan ini sang police, apang wala man sang problema nga maghatag sang assistance ang CAFGU Active Auxiliary (CAA) member nga si Donan Sosia, 32 anyos, apang suno kay Yulo kun tani gin-minimize lang ang natabo.
Para kay Yulo, kun Brgy tanod ukon pulis ang nagresponder mahimo nga mapacify lang nila ukon mapulihan agud madakop ang mag-amay.
Ginakwestyon sa karun ni Yulo, kun sin-o man ang commanding officer nga nagpahanugot nga magresponder si Sosia nga may bitbit pa nga service firearms nga M16 rifle kag kun ngaa ini naga-isahanon lamang nga mas maayo kun madamo ini sang upod agud makabulig sa pagdakop lamang kag indi maglab-ot sa punto nga pagkapatay sang mag-amay.
