Naghilibion ang magulang sang isa ka biktima sa nahulog nga mini dump truck sa pil-as sa Sitio Orang, Brgy Kalamtukan, Bayawan City, sang Miyerkules, sang mahibaloan ang pagkapatay sang naga-isahanon sini nga lalaki nga utod.
Madumduman nga napatay sa insidente sanday Egmedio Arnaiz, Diomedes Canoy, Kervin Andog, Larry Llamos, Ronel Cabasag, Jonathan Hamor, Jovanie Babor kag Jonaryl Caguisa, lunsay mga empleyado sang City Agriculture Office – Engineering Division kag ang isa ka On the Job Training (OJT) engineering student nga si Warren Arceñas.
Sa interview sang Bombo Radyo kay Betsaida Dicto, magulang ni Kervin Andog, ang iya manghod amo ang agot sa ila nga mag-ululutod kag naga-isahon nga lalaki.
Suno diri, tuman ang pagpalangga sang ila iloy kay Andog nga bisan may asawa na ini, wala untat ang ila iloy sa pagpamangkot kun nakapauli na siya sa ila balay halin sa trabaho.
Suno diri, bangod nga indi pa regular employee si Andog kun kaisa nagapangayo ini sang balon sa ila iloy apang ang kwarta ginatunga pa sini bakal sang tinapay.
Suno pa kay Dicto, mapinalanggaon nga tawo ang iya manghod indi lamang sa iya bata apang amo man sa iya mga hinablos.
Luyag ni Dicto nga mapalab-ot kay Andog ang mensahe nga tuman ini nila nga palangga kag indi nila pagpabay-an ang iya nabilin nga pamilya.
