Wala sang nakita nga senyales sang foul play sa kamatayon sang isa ka Indian national nga nasapwan sa sulod sang balay sini sa San Julio Subdivision, Barangay 2, San Carlos City sang Lunes sang aga.
Ginkilala ang biktima kay Sukhwinder Singh, 45-anyos, kasado, kag residente sa San Julio subdivision, Caimito-Ilang-ilang St. Barangay 2, San Carlos City.
Sa interview sang Bombo Radyo Bacolod kay Police Captain Roby Aurita, deputy chief of police sang San Carlos City Police Station, ang collector/driver sang biktima nga si Melona Salazar ang nagpadulong sa San Carlos City Police Station agud nga magreport nga nasapwan nalang nga wala sang kabuhi ang boss sini.
Suno diri, sang tinalikdan pa nga Sabado nagacontact ang pamilya ni Singh gani ila ginhingyo si Salazar, ang kolektor sang Daljit Singh Lending Corporation, agud tsekyaron ini.
Wala nagasabat si Singh sa pagpanawag ni Salazar rason nga iya ini ginsulod sa kwarto kag didto niya naabtan nga wala na sang kabuhi nga biktima.
Suno kay Aurita, sandig sa resulta sang post mortem examination, cardiac arrest ang ginkamatay ni Singh.
