Ginsaysay sang amay kun paano sini naabtan ang makahalanusbo nga sitwasyon sang iya tatlo ka kabataan nga ginlampusan sang bato sa Hacienda Badiang, Brgy E. Lopez, Silay City.
Sa interview sang Bombo Radyo Bacolod kay Edmund Bornales, may trabaho pa ini bilang inkargado sa Brgy Mansilingan, Bacolod City sang Sabado sang aga kag alas-10:30 na ini nakahalin.
Siya ang nag-abot sa ila nga balay kapin alas-11:30 tubtob alas-12:00 sang udto.
Naabtan sini ang makahalanusbo nga sitwasyon sang iya kabataan.
Nakita sini ang 9 anyos nga babayi, apang suno sa iya nagatiskog na ang bata, samtang sunod sini nakita ang 15 anyos nga babayi kag apat ka tuig nga lalaki, nga may-ara pa sang ginhawa.
Gani ginhingagaw nalang sini salbar ang duha nga may-ara pa sang kabuhi kag nagsinggitan sang tabang.
Bisan ang mga kaingod ang nakibot sa pagsinggitan sang amay, bangod nakilala nila ini nga hipuson.
Suno diri, ang bato nga gingamit ang ila nga ginabutang bilang pagbangil sa piyertahan, nga gamay lamang ang deperensya sa kadakuon sang ulo sang bata.
Ang bato, ang ginbilin lamang sang suspect sa foam katupad sa mga biktima.
Nabuka man ang cellphone sang 15 anyos, apang wala pa mahibaluan kun ano ang rasun.
Ang bangkay sang 9 anyos nga napatay ang natalana na nga dalal-on na sa ila nga balay bwas.
Samtang ang 15 anyos ang kritikal sa karun ang kondisyon kag natalana nga ipaidalom sa operasyon.
Nakabugtaw naman ang apat ka tuig nga bata, apang ini ang may pilas sa mata, nga sa paglantaw sang amay kaangay nga ginkuritan sang kutsilyo.
Ginklaro man sini nga wala nalukat ang mata sang bata.
Nagpangayo ini sang pasaylo sa 9 anyos nga bata nga iya ginbiyaan para masalbar ang duha, kag nagalaom ang amay nga sila ang buligan sini sa pag-angkon sang hustisya.
Wala man sang ihibalo ang amay kun may nobyo ang 15 anyos sini nga bata bangod wala man sang may nagapamasyar kun siya ang magpauli.
Samtang wala paman sila makakit-anay sang overseas Filipino worker nga iloy nga nagpauli gikan sa Saudi Arabia kagab-i.
