Nalipatan nga kandila ang ginalantaw nga rason sa nagluntad nga sunog sa Purok Paghigugma, Barangay Alijis, Bacolod City, kahapon alas- 10:46 sang aga.
Sa interview sang Bombo Radyo Bacolod kay Fire Officer 2 Rolin Paulan, chief investigator sang Bacolod City Fire Station, ang tag-iya sang balay amo si Lady Desiree Pecha kag nagasindi sila sang kandila bangod sang Disyembre lang nagtaliwan ang amay sini.
Suno diri, ang kandila nabutang sa metal bowl nga natungtung sa altar nga human sa kahoy.
Nalipatan nga nakasindi pa ang kandila sang naglakat si Pecha kag ginalantaw nga una nga nadakop sang kalayo amo ang kurtina.
Totally damaged ang balay nga human sa light materials kag nagdangat sa P3,000 ang balor sang halit.
Wala naman sang may narekord nga casualties ukon injuries sa nagluntad nga sunog.
