Nagdangat sa masobra isa ka milyon ang balor sang kahalitan nga gintuga sang pagkasunog sang fashion shop sa Zone 12, Barangay Handumanan, Bacolod City alas-4:20 kaina sang kaagahon.
Sa interview sang Bombo Radyo Bacolod kay Fire Officer 2 Rolin Paulan, chief investigator sang Bacolod City Fire Station ang Kairo Fashion Shop ang ginapanag-iyahan ni Mary Jane Sevilla.
Suno diri, partially damaged ang tatlo ka panalgan nga building kun sa diin yara sa 1st alarm ang sunog nga nahimo ma-kontrolar alas-4:45 sang kaagahon kag nafireout alas-4:47 sang kaagahon.
Nagdangat sa 105 square meters ang nahalitan sang sunog, samtang balor P1,250,000 ang estimated nga kahalitan.
Ang Kairo Fashion Shop ang nagaparenta sang mga gowns, tuxedo kag iban pa.
Suno kay Paulan, dako ang posibilidad nga electrical ignition ang rasun sang sunog bangod wala man sila sang nakita nga chemical substance sa sulod nga mahimo makatuga sang sunog.
Wala man nagdako ang kalayo kag nakahalit sa iban nga estraktura bangod ang building ang may firewall.
Nahibaluan nga may mga katupad nga pamalay ang nasunog nga 3-storey commercial building.
Pahanumdom ni Paulan nga ipalantaw sa lisensyado nga electrician ang electrical structure sang building kag indi mag do it yourself (DIY) kun may ara sang kalay-uhon.
