Plano sang ciudad sang Bacolod nga iformalize ang mga tricycle kag mga trisikad nga nagapangkolekta sang basura sa ciudad sang Bacolod.
Sa interview sang Bombo Radyo Bacolod kay Ma. Fe Tresfuentes, pinuno sang Deparment of Public Services (DPS)-Bacolod, ang pagformalize sang mga tricycle kag trisikad nga nagapangkolekta sang basura sa ciudad ang ideya man ni Bacolod City Alfredo Benitez sang tinalikdan pa nga tuig.
Suno kay Tresfuentes, nahuman ang ideya matapos nga ginpresentar sang DPS ang rason sang ilegal nga paghaboy sang basura sa ciudad sang Bacolod.
Suno diri, ilabi na ang mga basura sang mga balay nga yara sa mga inner barangay sa ciudad nga nagasugo sa mga trisikad kag tricycle apang wala makahibalo kun sa diin sang mga ini ginahaboy ang basura.
Ginpahayag sini nga ang mga nagabukid nga basura nga makita sa ciudad ang resulta sang paghaboy sang mga trisikad kag tricycle drivers nga ginasugo nga maghaboy sang basura bangud indi man ang mga ini makasarang nga magdala sang basura sa sanitary landfill sang ciudad.
Maaddress lamang ang problema kun matumod na sang barangay kun sin-o ang responsable sa paghaboy sang mga basura.
Ginalantaw sang pamunuan sang DPS nga may yara sila sang ginadihon nga proposal agud nga mapatigayon ang cash for work program para sa natumod nila nga nagakinahanglan sang livelihood.
Ginpahayag man sini nga maumpisahan lamang ang plano paagi sa partnership sa Barangay agud matumod ang mga individual nga kabahin sang garbage collection activities.
