Ginpahayag sang abogado nga maalam ang nangin tikang ni Former Senate President Vicente “Tito” Sotto III nga pagpabilin apisar sa pagwalkout sang iya mga kaupdanan sa Senate minority.
Ini kasunod sang mosyon ni Senator Rodante Marcoleta nga pahanugutan ang remote participation kag electronic voting sa plenaryo.
Sa interview sang Bombo Radyo Bacolod kay Atty Renecito Novero, ang rules of procedure sa legislative assembly, kun may ara sang quorum, bisan pa may magwalkout sa tunga-tunga sang session, kinahanglan lamang sang 50 percent plus 1 sang mabilin nga Senador, mapasar na ang ginduso nga mosyon.
Gani sarang gid kuntani mapasar ang ginduso ni Marcoleta nga pagpahanugot sang electronic voting.
Suno kay Novero, maalam ang ginhimo ni Senator Sotto nga pagpabilin, bangod ini ang nagkwestyon sa mosyon kag nagtawag sang suspension sang hearing.
Bangod suspended ang session, wala naman sang quorum bangod madamo na sang nabuhin, gani dayunon na lamang ang botohay sa masunod nga session.
May proposal naman sadto sa pagpahanugot sang pagtambong ni Senator Leila de Lima sang ini ang napriso, apang ang mosyon ang wala man ginpaboran sa Senado.
Para kay Novero, indi nagakadapat nga pahanugutan ang mosyon agud maprotektahan ang dignidad sang Senado.
Pahanumdom sini nga highly questionable sa karun ang integridad sang Senado, kag ini ang maganubo pagid kun pahanugutan nga makatambong online ang mga Senador nga may ginapangatubang nga seryoso nga kaso.
