Wala natigayon ang ginaalegar plano kuntani sang mga inmate sa Bacolod Police Station 8 matapos nadiskubrehan sa ginpatigayon nga greyhound operation inspection sang Sabado ang ceiling sang prisuhan sang naamat-amat na lagari.
Sa interview sang Bombo Radyo kay Police Major Joery Puerto, station commander sang Bacolod Police Station 8, nagpatigayon sila sang regular greyhound operation inspection sang Sabado kag ila nakit-an nga may ginlagari nga kabilya sa male jail facility.
Suno kay Puerto, 25 ang mga lalaki nga nakahunong sa estasyon kag duha ang babaye.
Kalabanan sa mga ini ang may kaso may kaangtanan sa illegal nga druga.
Suno diri, kada alas 6:00 kag alas 9:00 sang gab-i, may ginapatigayon nga prayer meeting sa mga priso kag ginalantaw nga ginaamat-amat sang mga ini lagare ang kable samtang nagakanta sa prayer meeting agud indi bation.
Bilang pagresponde sa nadiskubrehan sang estasyon, ginadumilian sa karun ang pagbisita sa mga inmates kag hukson man ang duyan sa sulod sang facility.
Suno sa iya, maayo man ang nangin resulta sang greyhound inspection operation bangud natapna ang pagpalagyo sang mga inmates ilabi na nga isa lang ang ila jailguard kag masako man ang kapulisan sa mga operasyon.
