Kakulang sang preparasyon, wala sang tubig, budget cut sa fire department kag sala nga priorities ang ginatudlo nga rasun kun ngaa naglala ang wildfire sa Southern California.
Sa interview sang Bombo Radyo Bacolod kay Bernie Sarabia, Bombo International News Correspondent derekta sa San Bernardino County, California, sa karun nagsaka na sa 11 ang narecord nga napatay bangod sa wildfires.
Samtang may isa naman ka arsonist nga gindakop sa Kenneth County.
Suno kay Sarabia, ang lalaki ang nagabisikleta bitbit ang sulo kag ginalantaw nga amo ang nag-umpisa sang Kenneth Fire.
Pahayag sini nga tinalikdan nga tuig, 53 percent sang wildfire sa California ang tuga sang arson samtang ang iban ang nag-umpisa naman sa grass fire ukon bangod sa tuman na ka daan nga power lines.
Apang nagapati si Sarabia nga sala nga mga desisyon ang nagtuga sang paglala sang kahalitan.
Suno diri, may kasugtanan na kuntani nga magasupply sang tubig ang Northern California sa Southern California, apang nagdangat sa kasuhay bangod sa pagtamod sa mga maapektuhan nga isda gani ang sobra nga tubig ang ginwashout na lamang sa dagat.
Ginabasol man sang fire department ang paglala sang wildfire sa tuman ka dako nga budget cut sa departamento nga nakapahuyang sa ila nga fire fighting capacity.
Suno kay Sarabia, may nagakaigo nga budget kuntani apang mas ginhatagan sang prayoridad ang pag-amuma sa mga homeless migrants.
Pahayag sini nga may wildfires man nga natabo sa Florida apang preparado ang mga ini kag nakapatigayon na sang controlled burning agud wala na sang latayan ang kalayo.
Isa pa sa nakapalala sang sitwasyon sa California ang tuman ka baskog nga Sta. Ana Winds nga naghatag sang kabudlayan sa paglupad sang mga choppers ukon eroplano.
Madamo naman sang mga Hollywood celebrities nga anay supporter sang California governor, ang sa karun nagareklamo matapos matupok sang kalayo ang ila mga balay, partikular na ang mga million dollar houses kag iconic buildings.
Samtang madamo naman sang mga insurance company ang naghinalin.
Sa karun padayun ang pagpalong sa mga wildfires kag nagabulig naman ang mga indi apektado nga county, estado kag may ara man sang African country nga nagpasalig sang bulig.
Nagpasalig naman si outgoing US President Joe Biden nga buligan ang mga biktima sang sunog.
