Naggwa na ang resulta sang post-mortem examination sa bangkay sang 38-anyos nga babayi nga nasapwan patay kag wala na sang pang-idalom nga panapton sa Barangay Sibaca, Cadiz City sang Mayo 21.
Madumduman nga ginbilin sang bana ang iya asawa sa waiting shed agud magpa-gas apang sa iya nga pagbalik, wala na ini sa waiting shed.
Sa ila nga pagpangita kaupod ang iya nga bata, una nila nga nakit-an ang tsinelas sang iya asawa antes nasapwan ang bangkay sini malapit sa dalan.
Ang biktima ang ginkilala nga si Jenny Ann Delano nga residente sang nasambit nga lugar.
Sa interview sang Bombo Radyo kay Police Lt. Daleen Grace Loreno, Deputy Chief of Police sang Cadiz City Police Station, ginkumpirmar sini nga ang rason sang kamatayon ni Delano amo ang blunt force trauma to the head kag asphyxia by strangulation.
Suno kay Loreno, ang blunt force trauma to the head an resulta sang pagpanglampos sang suspetsado sa ulo sang biktima
Samtang, ang asphyxia by strangulation ang resulta sang pagkuga sa liog sang biktima gamit ang iya mismo nga sling bag.
Sa karon, ginahulat pa ang resulta sang dugang nga examination agud mahibaluan kun ini ang ginpanghimuslan.
Dugang pa ni Loreno, may ara na sang tatlo ka mga witness nga mahimo makabulig sa pag-imbestigar sang kaso.
Padayon naman ang imbestigasyon sang Cadiz City Police Station agud matumod ang responsable sa krimen
