Ginpahayag sang director sang Office of the Civil Defense – Negros Island Region nga kun sundon gid ang standard sang tent city sa ciudad sang Himamaylan, manubo sa isa ka libo ang evacuees ang sarang sini maakomodar.
Una nga ginpahayag sang Himamaylan City Government, nga ang tent city ang maka-akomodar sang masobra isa ka libo nga evacuees.
Suno kay OCD NIR Director Donato Sermeno, kun sundon gid ang standard sang tent city, ang mga tents ang dapat may antad nga duha ka metros sa kada isa kun sa diin mas magagamay na ang maakomodar sa area.
Suno kay Sermeno, ang Department of Agriculture ang magapahulam man sang ila nga propedad nga pahamtangan man sang tents sa ciudad sang Himamaylan.
Dugang pa sini ang propedad nga ginpahulam sang DA agud butangan man sang iban nga gamit magluwas sa tents kaangay lamang sang community kitchen.
Samtang ginpakigbahin man ni Sermeno nga sa ginpatigayon nga inter-agency coordination meeting kaupod ang magkatuhay nga mga national government agencies, mahimo na sang mga ini umpisahan ang paglay-out sang linya sang kuryente kag tubig para sa proposed tent city.
Suno sa OCD NIR Director, mahimo na nila maumpisahan ang paglay-out sang kuryente kag linya sang tubig para sa proposed tent city kag sila ang pagabuligan sang Engineering Battalion sang 303rd Brigade sang Philippine Army nga yara man nakabase sa ciudad sang Himamaylan.
Suno kay Sermeno, magluwas sa linya sang tubig kag kuryente, padayunon man sang mga ini ang pagpatindog sang mga tents.
Samtang nagpasalig nanan si Undersecretary Ariel Nepomuceno, nga amo ang OCD Administrator nga bululigan kaupod ang mga national government agencies kun ano man ang mga kakulangan sa patindugon nga tent city.
Apisar nga naumpisahan na ang pagpatindog sang tents, ifinalize pa sang OCD ang plano agud nga masiguro nga naplastar ini sang maayo.
Ginpahayag man nga ang mga most vulnerables ang ibutang sa evacuation centers bangud indi ang mga ini suitable nga patiniron sa tents.
