Ginklaro sang political analyst nga indi imposible nga ligwaton sang Korte Suprema ang ruling nga nagakonsiderar unconstitutional ang articles of impeachment batok kay Vice President Sara Duterte, apang manubo ang tyansa.
Sa interview sang Bombo Radyo Bacolod kay Atty Jomax Ortiz, sa karun gin-archive sang Senado ang articles of impeachment samtang ginahulat ang desisyon sang Korte Suprema sa ginfile nga motion for reconsideration sang House of Representatives.
Kun magdesisyon ang Korte Suprema sa pagreverse sang ruling, ang Senado ang magaconvene nga impeachment court kag dayunon na ang impeachment trial.
Pahanumdom ni Ortiz nga indi imposible nga liwaton sang Korte Suprema ang ila desisyon bangod ini ang makapila naman nga natabo.
Apang ginalantaw sang abogado nga yara lamang sa lima tubtob napulo ka porsyento ang tyansa, bangod ang mga previous cases ang yara sa demarcation line ukon halos tunga ang desisyon sang mga Justices.
Apang unanimous naman ang desisyon tuhoy sa unconstitutionality sang articles of impeachment batok kay VP Sara.
Apisar nga indi magpabor ang Korte Suprema sa motion for reconsideration, sarang gihapon makafile sang impeachment complaint sa Pebrero 6 sa masunod nga tuig.
Apang ang ginakahangawa sang abogado, kun gamiton sang kampo ni VP Sara ang Supreme Court ruling tuhoy sa one-year bar rule paagi sa pagfile sang unmeritorious complaints agud wala na sang iban nga makafile batok sa Bise Presidente.
Sa pihak nga bahin, nagapati ang abogado nga wala sang basihan ang pagtawag sa 19 ka mga Senador nga nag-YES sa pag-archive sang impeachment case bilang “Duterte Senators.”
Suno kay Ortiz, indi tanan nga mga Senador nga nagboto pabor sa desisyon ang pro-Duterte, sa baylo sila ang nag-adhere ukon nagdesisyon nga magsunod sa desisyon sang Korte Suprema.
Paathag sini nga kun para sa acquital ang ginbotohan, mahimo nga madamo man ang indi magboto sang YES.
