Nakasentro sa pagluib ni Judas kag pagpanginwala ni Pedro sang tatlo ka beses kay Hesu Kristo ang repleksyon kahapon, Martes Santo.
Suno kay Monsignor Felix Pasquin sang Our Lady of Candles Parish, masakit ang nahimo sang mga disipolo ni Hesus sa iya.
Ini ang nagapakita lamang nga kun ang kaaway ang magsikway sa atun, mahapos pa ini nga mabaton apang kun ang magluib ang atun pinalangga sa kabuhi, ini ang tuman kasakit.
Suno kay Monsignor Pasquin, apisar nga Diyos si Hesus, tawo man ini sadto gani nagsakit ang Iya balatyagon sa pagluib ni Judas nga iya ginsaligan kasubong man ang pagpanginwala ni Pedro nga iya na nga ginpredict.
Suno diri, wala pa ang Manluluwas nalansang sa krus, amu na ini nga butang ang naglansang sa Iya.
Suno sa iya, si Judas ang naghinulsol apang wala ini nagpati nga siya ang sarang pa nga mapatawad rason kun ngaa siya ang nangin desperado kag ginbitay ang iya kaugalingon.
Suno sa Monsignor, sa atun pagpangabuhi, kun kaisa may pagka-Judas kita ukon pagka-Pedro apang apisar sang atun mga kasal-anan, ginpanginmatyan kita sa Ginoo.
Gani nagapanugyan ini nga maskin ano kadako sang problema ukon maskin anu kabug-at sang sala, ang Diyos ang handa gid nga magpatawad.
Suno sa iya, kun sundon lamang ang alagyan sang Ginoo sa pag-antos, ini ang nagadala sang kadalag-an.
