Padayon ang imbestigasyon sang Bacolod City Police Station 1 natuhoy sa pagtiro sa isa ka lalaki sa Palanca-Burgos St., Barangay 12, Bacolod City sang Disyembre 16 sang hapon.
Ginkilala ang biktima nga si Jordan Rafols, 31 anyos, kag residente sang Barangay 13 sa nasambit nga ciudad.
Ginpahayag ni Police Captain Francis Depasucat, Station Commander sang Bacolod City Police Station 1, wala sang kriminal rekord si Rafols sa mga kapulisan ukon Barangay.
May tatlo ka motibo nga ginalantaw ang Bacolod City Police Station 1 natuhoy sa pagpangluthang sa biktima, kag ini ang may kaangtanan sa iya trabaho, personal, kag kun ini ang affiliate sa isa ka grupo.
May mga nabilin man nga bonet kag iban pa nga narekober kaangay sang pila ka basiyo sang bala sang armas luthang sa crime scene.
Dugang pa ni Depasucat, naka request naman ini sila sa mga establisyemento nga may CCTV footage agod makabulig sa imbestigasyon agod matumod ang suspetsado sa krimen.
