Gina-verify pa sang mga kapulisan sang Kabankalan City Police Station kun matuod nga katapo sang New People’s Army (NPA) ang nagtiro-patay sa isa ka lalaki sa Sitio Lumbia, Brgy Camansi, Kabankalan City, Negros Occidental sang Biyernes, Oktubre 3.
Ginkilala ang biktima kay Danny Francisco, kasado, chairman sang grupo sang Argrarian Reform Beneficiaries sa ila nga lugar.
Ang ginatudlo nga suspetsado ang tatlo ka wala makilal-an nga persona.
Santo sa imbestigasyon sang mga kapulisan ginpahayag sang utod sang biktima nga si Sonny, nga samtang nagalakat pauli sa ila balay nakabati ini sang duha ka lupok nga ginpinsar sini nga palupok lamang.
Apang sang malapit na sa ila balay, nabatian sini nga nagasinggit si Danny nga “Si Noknok palatyon,” nga nagatumod sa iya.
Bangud sa kahadlok nagpalagyo ini sa katubuhan kag nagpanago apang samtang nagadalagan liwat ini nakabati sang lupok.
Tubtob nga may nagpahibalo na lamang kay Sonny nga gintiro na ang iya utod.
Gindala pa ang biktima sa ospital apang gindeklarar nga dead on arrival bangod sa naangkon nga pilas sa tangkugo kag abaga.
Sa interview sang Bombo Radyo Bacolod kay Police Lt Col. Roberto Indiape, hepe sang Kabankalan City Police Station, indi man kilala sang pamilya sang biktima ang mga suspetsado.
May nagagwa nga impormasyon nga NPA ang nagpatay sa kay Danny, apang ini ang subject for validation pa kag wala man sang witness nga makakumpirmar.
May nabaton man nga impormasyon ang mga kapulisan nga anay rebelde ang biktima nga nagsungka sa 47th Infantry Battalion sang Philippine Army, apang ini ang ila pa nga i-validate.
