Ginpahayag sang hepe sa Himamaylan Municipal Police Station nga may posibilidad nga mistaken identity ang pagkatiro-patay sa isa ka manunudlo
kagab-i.
Suno kay P/Lt Col. Reynante Jomocan, gin-athag sini nga nakapauli na sa ila nga balay ang biktima nga si Mercy Miguel upod sa iya nga bana antes natabo ang insidente sa Sitio Calasa, Barangay Caradio-an, Himamaylan City, Negros Occidental kapin alas-8:30 kagab-i.
Sa imbestigasyon sang Himamaylan City Police Station, ang mag-asawa ang nagikan sa Public Plaza sang syudad kag kaupod nila ang ila tatlo ka mga kabataan nga sakay sa separado nga motorsiklo.
Nauna sa pagpauli ang maestra kag bana sini kag wala pa sang nakabalabag nga bato sa dalan sang sila ang nagpauli.
Pag-abot sang mga kabataan, nagpahibalo ang mga ini nga may-ara na sang bato nga nagalambat sa dalan gani ang mag-asawa ang nagpadulong sa lugar upod sa iya nga bayaw.
Suno kay Jomocan kapin 400 metros lang ang kalayoon sang balay sang biktima sa ginluntaran sang insidente.
Ginkuha sang mga ini ang bato agud nga malikawan nga may madisgrasya sa dalan kun sa diin nauna naman nga nagpauli ang bayaw, apang sang magahalin na kuntani ang mag-asawa sa lugar sakay sa motorsiklo, didto na kag sila ang ginluthang.
Sa panaysayon sang bana, naghambal nalang ang maestra nga siya ang naigo kag gilayon nga natumba gikan sa motorsiklo.
Suno sa hepe, kun sila ang target ginluthang na ang mga ini sa una palang nila nga paglabay sa lugar gani mahimo nga ini ang mistaken identity.
Ginalantaw sang mga ini nga may ginabantayan ang mga suspetsado apang ang mag-asawa amo ang nag-abot kag sila ang natiruhan bangod madulom ang lugar.
Dugang pa ni Jomocan nga ginpatay man ang bana kun sila gid man ang target sang mga suspetsado.
Ang manunudlo ang naigo sa kilid kag wala maglapos ang bala nga mahimo nakaigo sang vital organ nga gintunaan sang kamatayon ni Miguel.
Ginkumpirmar naman ni incumbent Punong Barangay Evic Miguel sa Barangay Antonio, Himamaylan City nga nagapapili bilang konsehal sa syudad nga pakaisa sang bana sang manunudlo nga wala naga-entra sa pamulitika ang mag-asawa.
Pahayag sini nga ginapanindugan sang manunudlo ang pagkaneutral bilang isa ka government employee.
Wala naman mapinsaran ang Punong Barangay nga rasun agud patyon ang manunudlo.
Santo sa imbestigasyon sang Himamaylan City Police Station, mabuot ang pagkilala sang kadam-an sa manunudlo kag ini ang natalana pa kuntani nga magserbe Electoral Board Support Staff subong nga eleksyon.
Pahayag ni Jomocan nga nakasugilanon na nila ang 16 anyos nga bata sang biktima kasubong man ang bayaw.
Padayun sa karun ang imbestigasyon sa mahimo motibo sang pagpangluthang.
