Ginatugyan na sang Central Negros Electric Cooperative (CENECO) sa incoming Marcos administration kun mapanubo ang rate sang kuryente.
Sang tiempo kampanya, ginpahayag ni president-elect Ferdinand ‘Bongbong’ Marcos nga tinguhaan sini nga mapanubo ang rate sang kuryente paagi sa dugang nga power plants, ilabi na ang renewable sources.
Suno kay Ma. Luisa Parroco, head sang Coop Promotions Section sang CENECO, nagmahal ang rate bangud sa Electric Power Industry Reform (EPIRA) Law.
Ang electric cooperative ang proyekto sang amay ni Bongbong nga si former president Ferdinand Marcos gani mahimo nga mapanubo sini ang rate sa iya nga pagdumala.
Sa karon, ang CENECO ang nagasukot sang masobra P11 kada kilowatt hour apang bisan ini ang pinakamanubo sa bilog nga Western Visayas suno kay Parroco, ikaduha naman ini sa pinakamataas sa bilog nga kalibutan.
Suno kay Parroco, kuntani matabo ang power rate decrease sa idalom sang Marcos administration kaangay sang plano sa presyo sang bugas.
Nahibaluan nga ginapasa man lang sa mga konsumidor ang mga charges sa generation, transmission kag distribution gani mahal ang kuryente, indi kaangay sang tion sang National Power Corporation kun sa diin may yara sang subsidy ang gobyerno.
Naghingyo man ini nga bisan lain ang presidente nga ginboto, pangamuyuan nalang ang mga opisyales para sa maayo nga pagdumala.
