Welcome development para sa secretary general sang Power Watch Negros ang pagnubo sang sukot sang Central Negros Electric Cooperative (CENECO) sa kuryente.
Nahibaluan nga may pagnubo nga P2.40 kada kilowatt hour nga sukot sa kuryente sa Central Negros Electric Cooperative (CENECO) subong nga bulan sang Hunyo.
Bangod sini nagnubo ang per kilowatt hour nga billing sa P12.76.
Ini ang tuga sang pagnubo sa generation charges kag pagsaka sang supply sang kuryente sa market.
Suno kay Lapore, ang pagnubo ang resulta man sang pagbaylo sa tig-ululan indi kaangay sang summer kun sa diin mataas ang demand kag mas madamo ang nagakatabo nga outages.
Paathag ni Lapore nga kun estable ang grid, naga-estable man ang presyuhanay partikular na sa Wholesale Electricity Spot Market (WESM).
Sa interview sang Bombo Radyo Bacolod kay Wennie Sancho, dako ini nga bulig para sa mga kunsumidor.
Suno kay Sancho, ini man ang ginahulat sang tanan agud nga mabuhin-buhinan ang ila nga mga kabudlayan.
Suno diri, ang ini nga development ang positibo para sa tanan nga mga konsumidor.
Kadungan sini ginpasalamatan man ni Sancho ang mga local officials nga sanday Bacolod City Mayor Alfredo ‘Albee’ Benitez, Negros Occidental Vice Governor Jeffrey Ferrer kag ang mga personnel sang Negros Electric Power Corporation Inc. nga bisan wala pa naaprubahan ang prangkisa nagabulig na sila sa CENECO.
