Nagpanugyan ang Provincial Health Officer sang Negros Occidental nga himuon prayoridad ang pagpabakod sang immune system bilang kabahin sang precautionary measure sa coronavirus disease 2019 (COVID-19).
Sa programa nga Doctor Bombo, ginpahayag ni Dr. Ernell Tumimbang nga magluwas sa pagmintinar sang matinlo nga hygiene, importante gid ang pagpabakod sang immune system bangud masami nga nagaka-apektuhan sini ang mga mahina ang depensa.
Suno kay Tumimbang, masami nga nagaka-apektuhan sang virus ang mga tigulang bangud medyo mahina na ang immune system sang mga ini kag mahinay ang pag-ilis sang mga cells bangud sa katigulangon.
Suno sa iya, mas mataas ang risgo sang mga cancer patients ukon may mga problema sa immune system bangud nagahina na ang ila mga cells gani kun sudlon ang mga ini sang virus, dako ang tsansa nga madulaan ini sang kabuhi.
Gindugang man sini nga kinahanglan nga maghalong ang mga nagabusong bangud posible nga mapasa ang virus sa ila nga bata.
Suno sa provincial health officer, madasig man nga madutlan sang COVID-19 ang mga nagapanigarilyo bangud masami nga may masakit ang mga ini sa baga.
Gani, nagpahanumdom si Tumimbang nga magkaon kag magtulog gid sang maayo agud mangin mabaskog ang kalawasan batok sa mga virus kag masakit.
Nagpanugyan man ini nga masami nga manghugas sang kamot, magbalon sang alcohol, sundon ang mando nga “social distancing” kag kun wala man lang sang importante nga kadtuan, indi na lang magwa sa balay.
