Gin-athag sang principal sang Bacolod City National High School nga may pagsulundan sa pagkuha sang cash advance kag ini ang dapat ginaliquidate.
Ini matapos ginmando sang Commission on Audit ang pagwithhold sang sweldo sang pila ka accountable officials sang Department of Education bangod sa P6.96 billion nga wala naliquidate nga cash advances (CAs) santo sa 2023 Annual Audit Report.
Kun sa diin P513.9 million ang narecord gikan sa Region 6 ukon Western Visayas.
Sa interview sang Bombo Radyo Bacolod kay Richard Gelangre, presidente sang Bacolod City Public School Teacher’s Federation masami nga nagacash advance amo ang mga non-independent unit (non-IUs) nga eskwelahan kun sa diin ang liquidation ang yara sa division office.
Suno diri, ginahimo ang cash advance para sa mga galastuhan sang eskwelahan kag ini ang dapat nga ginaliquidate sa kasunod nga bulan.
Apang sila sa Bacolod City National High School, sa masami mas ginapili na lamang nila ang reimbursement sangsa magcash advance.
Ginalantaw sang principal nga mahimo madamo sang mga nagcash advance apang ginpabuyan-buyanan.
Aminado ini nga sa masami ginaproblema sang accounting department ang kulang kulang nga mga supporting documents partikular na ang resibo ilabi na kun ginpabuyan-buyanan kag madula.
Ang mga accounting officers naman nga nagpirma sa disbursement amo ang mas nagapanabat kag secondary na lamang ang eskwelahan nga nagrequest.
Apang suno kay Gelangre, sa DepEd division of Bacolod City, kun may unliquidated cash advance, ang eskwelahan ang wala ginapahanugutan nga liwat makacash advance tubtob wala pa masettle ang liquidation.
Samtang kun madugayan kag ma-audit sang COA, ang mga ini ang ginapadal-an man sang memo nga mahimo kaangay sa nagakatabo sa karun.
Apang mas nagakahangawa si Gelangre sa posibilidad nga ini ang kaangay sa kaso ni Mary Jane Piattos ukon ang kwarta nga gindisburse ang wala man nagkadto sa eskwelahan rasun nga indi maliquidate.
Dugang pa nga makatilingala ang balor nga nagdangat sa masobra tunga sa bilyon ka pesos.
