Ginduso ni Bacolod City Lone District Congressman Greg Gasataya ang pagpasar sang House Bill 8648 kag House Bill 8649 nga nagatuyo sa pagpadasig sa pagbakal kag paghatag sang COVID-19 vaccine sa mga local government units sa ginpartigayon nga hearing sang House Committee on Appropriations sang Miyerkules, Pebrero 10, 2021.
Sa interview sang Bombo Radyo Bacolod kay Gasataya, nakahibalo siya nga may yara sang Procurement Act kag kun sundon lang ini, indi makahingagaw sa paghatag sang bakuna ang mga LGUs sa pungsod.
Ginpahayag sini nga bilang Vice Chairman sang komitiba, nag co-author siya sa duha ka mga hagna bangud iya nakita kun ano ka importante nga mahatagan sang bakuna sa mas madali nga panahon ang mga pumuluyo kag mapasiguro nga mahatagan sang nagakaigo nga pagtatap sang gobyerno ang mga madapatan sini.
Tinutuyo sang mga hagna nga mahatagan sang otoridad ang mga LGU nga makabakal sang bakuna pati na ang pag angkon sang mga kagamitan ukon serbisyo nga kinahanglanon sa pagbakal, pagbaton, storage kag pagdapat sang bakuna sa mas madasig kag mas epektibo nga pamaagi.
Nalakip sa kaundan sang mga hagna ang paghatag sang pondo.
Kabahin man sang kaundan sang mga hagna ang paghatag sang pondo para sa monitoring sang nabakunahan nga mga pumuluyo kag Epidemiology and Surveillance Units sa idalum sang Department of Health ukon ginatawag nga Adverse Effects Following Immunization.
Nalakip man sa mga hagna ang tax kag duty exemptions sa bahin sang LGU sa pagbakal, pagpanagtag kag pagdapat sang bakuna.
Nagtambong man sa committee hearing ang mga tiglawas gikan sa DOH, Government Procurement Policy Board kag Vaccine Czar Secretary Carlito Galvez.
