Ginkumpimar sang chairman sang inter-agency task force against coronavirus nga apisar wala sang selebrasyon nga patigayunon sa pila ka mga barangay subong nga adlaw kadungan sang kafiestahan ni San Juan de Bautista, wala naman ginadumili ang mass gathering lakip na ang pagpadulong sa mga baybay.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga ginapahanugutan ang mass gathering sa idalom sang Modified General Community Quarantine basta magsunod lang sa minimum health protocols.
Suno sa bise alkalde, dapat sundon man sang mga tag-iya sang beach resorts ang 50% capacity.
Nagpanugyan man ini sa mga magapadulong sa baybay nga iobserbar ang 1-meter distance sa both sides.
Ginalantaw naman sini nga diutay lang ang magapadulong sa mga baybay bangud nakulbaan ang mga tawo nga maglagaw bangud sa coronavirus pandemic.
Samtang, ginpasalig naman sang tagpamaba sang Bacolod City Police Office (BCPO) nga nakahanda ang kapulisan para sa pagbantay sa mga baybay subong nga adlaw.
Sa interview sang Bombo Radyo kay P/Lt. Col. Ariel Pico, sang Lunes nagsapol na sa tagsa ka mga hepe si BCPO director Col. Henry Biñas agud talakayon ang security plan para sa subong nga adlaw.
Suno pa diri, indi manigar nga may ara gihapon sang magakadto sa mga beach resorts subong, apang iya ginapanugyan nga kun mahimo man lang magtinir na lang sa balay.
Apang gin-athag ni Pico nga wala ginadumilian ang pagpadulong sa mga baybay.
Iya man lang kuntani amo nga maghalong ang tanan agud malikawan nga matapikan sang balatian.
