Pahalinon na sang Public Order and Safety Office (POSO) ang mga nagahimo sang illegal transaction sa Bacolod Public Plaza.
Madumduman nga sang Setyembre 17, ginbawian sang kabuhi ang manicurista nga si Annie Pula nga nagapwesto sa plaza matapos nga ginbuno sang gina-alegar iya gina-bugaw.
Suno kay Retired Gen. Primitivo Tabujara, pinuno sang Public Order and Safety Office (POSO), nagpalapit sa ila si Annie Pula kag nagpahayag nga nakabaton ini sang pagpamahog sa kabuhi kag siya ang gin-abisuhan nga magpablotter sa police kag indi anay magbalik sa plaza.
Nagpadulong ini sa police station apang bangod nga madamo sang nagapila ginpa-iway anay sini ang pagpablotter.
Wala naman nagsunod si Annie Pula sa abiso nga likawan ang sa plaza kag liwat nga nagpadulong didto kag amo na nga natabo ang insidente.
Suno kay Tabujara, ginamonitor na kag gina-identify sang POSO ang mga nagabuhat sang illegal nga transaction sa plaza.
Plano man sini nga pabutangan sang dugang nga suga ang area kag striktohon ang pagsaway sa mga nagatulog kag nagatambay sa plaza kun gab-i.
