Nagapati ang secretary-general sang General Alliance of Workers Association (GAWA) nga dapat tun-an sang maayo kag may yara sang public consultation nga patigayunon antes ipatuman ang surveillance testing sa mga food delivery drivers sa Bacolod.
Nahibaluan nga nagaplano karon si Executive Assistant to the Mayor Ernie Pineda nga irekomendar sa Emergency Operations Center (EOC) nga ipaidalom sa surveillance testing ang mga food delivery drivers sa ciudad.
Sa interview sang Bombo Radyo Bacolod kay GAWA secretary-general Wennie Sancho, ginpahayag sini nga dapat tun-an sang husto ang implikasyon sang amo nga tikang.
Dugang pa sini nga dapat may bastante nga nga public consultation kag public hearing antes ini ipatuman.
Nagapati man si Sancho nga maayo ang katuyuan sang surveillance testing apang dapat man lantawon ang epekto sini sa labor sector.
Suno kay Sancho, imbes nga pataason ang employment opportunity daw kaangay nga mas ginapabudlay pa gid ang sitwasyon sang mga mamumugon karon ilabi na ang mga food delivery riders nga isa sa pinaka-produktibo kag profitable nga sektor sa karon.
