Aminado ang hepe sang La Carlota City Police Station nga dako ang mabulig sang pagpakita sang Stepfather ni Pearl Joy Galve sa pagsolbar sang kaso.
Sa interview sang Bombo Radyo Bacolod kay Police Lt. Col. Lymel John Pasquin, padayun pa ang pagtipon nila sang mga ebidensya.
Sa karun nga si Rene John Nasis alias Negro ang yara sa kustodiya sang Criminal Investigation and Detection Group (CIDG) – Bacolod.
Ginpili sini nga magpalapit sa CIDG – Bacolod bangod siya ang isa sa ila nga agent, apang gin-athag man nga ini ang wala gin-aresto bangod wala man sang warrant of arrest batok sa iya.
Madumduman nga si Nasis ang ginabasol sang kadam-an nga amo ang may kahimuan sang krimen, apang ini ang hugot man nga ginpanginwala sang stepfather.
Suno kay Pasquin, sila ang nagakoordinar sa CIDG-Bacolod bangod sa ila imbestigasyon, sila ang magakinahanglan man sang statement ni Nasis.
Samtang, tubtob sa karun sila ang padayun pa nga nagahulat nga maggwa ang resulta sang autopsy examination sa bangkay ni Pearl Joy.
