Aminado ang anay gobernador sa Negros Occidental nga nagaplastaranay na karun palang ang Marcos kag Duterte para sa 2028 Presidential Elections.
Sa interview sang Bombo Radyo Bacolod kay former Negros Occidental Governor Rafael “Lito” Cosculluela, nagapangita na ang parehas nga grupo sang alliances, rasun kun ngaa sila ang parehas nga nagapalapit kay former Vice President Leni Robredo.
Madumduman nga una nga ginbisitahan ni Vice President Sara Duterte si Robredo, nga ginsundan sang pag-imbetar man sa iya sa event ni President Ferdinand “Bongbong” Marcos Jr.
Suno kay Cosculluela, mahumok ang tagipusuon ni Robredo kag indi sini mabatas nga indi akomodaron ang mga nagapalapit sa iya, apang ini ang wala nagakahulugan nga siya ang magasuporta na sa mga ini.
Pahayag sini nga tuman ka layo sang prinsipyo sang Duterte kag Marcos sa prinsipyo ni Robredo.
Nagapati si Cosculluela nga masako pa sa karun si former VP Leni sa pagpangampanya bilang alkalde sa Naga City, luwas pa sa mga Angat Buhay project sini.
Ginalantaw ang anay gobernador nga maga-endorso lamang si Robredo sang kandidato nga consistent sa ginatindugan nga prinsipyo.
Paathag sini nga kun may prinsipyo ang Duterte kag Marcos, wala nabunggkag ang ila nga UNITEAM.
Ginakasubo naman sini nga malaka nagid lamang sa karun ang matawag “good governance”.
Suno diri, ang balantayan sa 2025 Midterm Elections amo ang mga kandidato nga mangisog sa pagkontra sa mga political dynasty.
