Istoryahan sang Provincial Incident Management Team sa Lunes kun ibalik na sa normal ang inadlaw sang trabaho sang mga empleyado sa Kapitolyo kag istoryahan man ang posibilidad nga palip-utan ang curfew hours sa probinsya.
Sa interview sang Bombo Radyo kay Negros Occidental Governor Eugenio Jose Lacson, ginkalipay sini nga madamo ang nakarecover sa COVID sang tinalikdan nga mga inadlaw.
Bangud sini, nabuhin-buhinan ang nagatinir sa quarantine facilities.
May koordinasyon man sa tunga sang provincial government kag mga kabanwahanan ukon kaciudaran agud nga makontrol ang returning residents, santo sa available nga quarantine facilities.
Aminado ang gobernador nga nagasaka-panaog ang COVID cases sa probinsya gani nagpanawagan ini nga mangin vigilante gihapon kag magsunod sa health protocols.
Naghingyo man ini sa mga Negrense nga indi na magbalibad kun turno na nga magpabakuna bangud ini ang makabulig sa recipient.
Suno sa gobernador, istoryahan sa meeting sang PIMT kun ibalik na sa regular nga lima ka adlaw ang trabaho sa Kapitolyo.
Nakahanda naman ang gobernador nga palip-utan ang curfew hours sa probinsya apang subject pa ini sa diskusyon sang PIMT sa Lunes nga natabuan naman nga ulihi nga adlaw sang bulan sang Mayo.
