Igapropose ni Bacolod City Engineer’s Office Head Engr. Loben Ceballos nga malakip nalang sa proyekto sang contractor ang pagpalos sang street light nga yara sa tunga sang dalan sa Bacolod-Negros Occidental Economic Highway (BANOCEH).
Sa interview sang Bombo Radyo Bacolod kay Ceballos, gin-athag sini nga sila ang wala nagapamatok sa pagpalos sa street light nga ginalantaw na nga road obstruction kag mahimo makatuga sang disgrasya.
Apisar nga jurisdiction sang City Engineer’s Office ang street lights, malawig pa ang proseso kun sa ila ipaagi ang pagpalos sini.
Paathag ni Ceballos nga ang sakop lang sang ila maintenance budget amo ang pag-ilis sang mga pundido nga bombilya.
Apang sa pagpalos kag pagsaylo sang street light, ini ang magakinahanglan pa sang deliberasyon, magapangita sang source of fund kag madamo pa sang malabayan antes ma-aprubahan.
Dugang pa nga apisar ma-aprubahan, hulaton pa kun san-o maabot ang budget.
Bangod ang BANOCEH ang yara sa jurisdiction sang Department of Public Works and Highways Regional Office 6, siya ang magakoordinar sa talatapan kun mahimo nga mapropose sa contractor nga malakip na lamang sa ila nga scope of work ang pagpalos kag pagsaylo sang street light.
Ini ang posible man nga himuon bangod nagaserbe nga road obstruction ang street light sa ila nga road project.
Pinaagi sini, mas madasig nga mapatuman kag masolusyonan ang kahangawa nga makatuga sang aksidente ang street light nga yara sa tunga sang dalan
