“Pagpamahog” ang rasun nga ginalantaw sang National Bureau of Investigation (NBI) Special Agent, gani nabutang ang iya nga pangalan sa papel nga kaupod sang mga utod nga nawala nga kamot, nawala nga tiil kag pares sang dulunggan nga ginbilin sa gwa sang NBI-Bacolod Office kahapon.
Sa interview sang Bombo Radyo Bacolod kay Police Capt. Glenn Montaño, station commander sa Bacolod Police Station 2, gintest na sang Scene of the Crime Operation (SOCO) ang nasapwan nga parte sang lawas sang tawo agud matumod kun ini ang gikan sa babayi ukon lalaki.
Sa pihak nga bahin, sila ang nagkoordinar naman kay agent De Arca, kag ginalantaw sa karun nga anggulo sa pag-ulamid sa pangalan sini, ang personal ukon may kaangtanan sa trabaho.
Paathag ni Montaño nga indi matago ang posibilidad nga mahimo kaupod man sang NBI agent sa trabaho ang naghimo sang krimen agud mapunggan ang accomplishments sini, nga amo sa karun ang top performing officer sa ila nga hanay.
Samtang mahimo man nga ini ang may kaangtanan sa iya trabaho bilang NBI agent.
Suno kay Montaño, sang 2021 pa sang nagpamuno si De Arca sa pagkumpiska sang tunga sa kilo nga shabu, samtang sang damlag lamang sini nga mga operasyon ang nakafocus sa anti-illegal gambling partikular na sa small town lottery (STL) kag e-sabong.
Wala naman sang nabatun nga pagpamahog si De Arca, antes ang insidente.
Samtang, gin-athag man sini nga mismo si NBI-Bacolod Head Atty. Renoir Baldovino ang nagpapatay sang CCTV camera sang Miyerkules sang gab-i bangod ini ang nagahuran.
Apang pagka-aga, didto naman nasapwan ang ginbilin nga mga chop-chop nga bahin sang lawas sang tawo.
Suno kay Montaño, magluwas sa NBI-Bacolod, malayo na nga mga establishimento ang may-ara sang CCTV camera.
